SA AKON MGA PINALANGGA NGA MGA KASIMANWA:

 

ANG MINA MASINADYAHON, MALINONG KAG MATAWHAY NA.  PALANGGA KO ANG MINA!

 

             Ang pagpadalagan ko sang aton banwa ginanabase ko sa mga laye kag sa legal nga pamaagi  nga may konsultasyon, hinun-anon kag partisipasyon sang tanan nga involved nga agensya sang gobierno kag sang mga pumuluyo.  Ginasiguro ko nga ang tanan nga transaksyones may transparency o masanag ukon maathag sa tanan ang pamaagi.

            I transformed Mina as one of the most progressive municipalities in the country, madamo sang mga programa kag  proyekto ang naimplementar sang maayo kag nagsunod sa insakto nga proceso. Tungod sini naging destinasyon kita sang  nagkalain-lain nga mga kabanwahanan sang Pilipinas agud mag obserbar kun paano naton napadalagan sang tadlong ang mga proyekto kag programa diri sa aton banwa.  Ang mga Best Practices naton nga naghatag sa aton sang mga national award ginabisitahan kag ginasunod sang iban nga mga banwa,

        Ang aton banwa  sa tuig 2017 nakabaton sang masunod nga anum (6 ) ka national awards:

1. Seal of Good Local Governance Award  ginhatag sang DILG
2. Seal of Good Education Governance halin sa DILG kg Synergeia Foundation, Inc.
3. First Place in eGovernance National Award  ginhatag sang DILG, DICT kg NICP
4. Most Business Friendly LGU  halin sa Philippine Chamber of Commerce & Industry (PCCI)  kg DTI
5. Seal of Good Financial Housekeeping  from DILG and DBM
6. Mina Health Center won as pioneer health facility in  to have offered the Expanded Newborn Screening Services  halin sa Department of Health

       Ang Opisina sang Mina Municipal Treasurer sa sulod sang 10 ka tuig ginakilala sa Probinysa sang Iloilo sa “Best in Financial  Records Management” o maayo nga pagdumala sang pinansyal nga aspeto sang banwa.

      Gintaya ko ang akon kabuhi sa pakipagbato  kag pauntat sang makahalalit nga droga diri sa banwa sang Mina.  Tungod sini nga pagpaninguha , gindekalarar ang Mina nga “Drug-Free “ nga banwa sa Probinsya sang Iloilo  kag ini ginpaagi sa validation sang Philippine Drug Enforcement Agency (PDEA), Philippine National Police (PNP) Regional Command, DILG and Department of Health.

        Napatindog man ang “Balay Paglaum”, kun sa diin ini temporary nga puloy-an sang mga kabatan nga nakasala sa aton laye or Children in Conflict with Law (CICL) kag mga babaye nga  biktima sang mga pag abuso. May Mina Skills Training Center man nga gin establisar kun sa diin ang mga kurso accredited sang TESDA. Ang mga wala trabaho kag Out-of-School Youths nga katapos sang High School maka training sang libre  diri sa Center para sa kurso nga Welding, Electricity, Housekeeping, Masonry kag Carpentry. Ini ang nakasabat sa pagnubo sang unemployment rate sang aton banwa kag ini sabat sang K-12 program sang DepEd.

        May ginpadalagan man kita nga Mina Community eCenter kag Mina Tech4ED Center kun sa diin ini lugar nga ginatudluan ang tanan nga sector sng komunidad  mag gamit sang computer kag may mga modules parti sa nagkalain-lain nga mga programa sa livelihood kag negosyo nga ginatudlo Diri man pwede makagamit ang aton pumuloyo sang internet services  sa manubo nga bayad.

           Sang 2008, napasaylo sa bag o nga lokasyon, sa lima ka hectares nga lupa sa Brgy. Bangac  kag napintundugan sang mga classtooms ang Mina National High School paagi sa inisyatibo sang gobierno local sa akon adminstrasyon kag subong isa na ka best secondary schools sa probinsya sang Iloilo.

           Ang aton Health Services  paagi sa Mina Birthing Facilities nagabukas 24/7  para magserbsiyo sa mga maternity and health needs sang  nanay kg mga lapsag diri sa Mina. May Mina Laboratory and Health Clinic man kita nga may mga moderno nga apparatus  nga makahatag maayo nga serbisyo sa aton pumuluyo.

           Gin establisar ang Municipal Disaster Risk Reduction Management Office (MDRRMO) kag may mga sampaton nga tao nga ginhanas sa pag responde sa oras sang emergensya kag kalamidad nga matabo kag bukas ang opisina nga ini  24/7 para maabtik nga serbisyo.

         Nagapadayon man ang pagsemento sang aton mga dalanon sa nagkalain-lain nga barangay para sa masulhay nga transportation sang aton mga pumuluyo.  Ang programa sa agrikultura ginatagaan man importansya ilabi nag gid sa pagtudlo gamit sang mga bag o nga makinaryas kag bag o nga mga teknolohiya sa pagpataas sang produksyon sang aton mangunguma.

         Ginaatipan man ang aton mga senior citizens o aton mga kamal-aman nga mahatag sa ila ang nagakaigo nga benepisyo kag serbisyo.

       Ang nabilin nga problema naton subong ang  basura sang aton mga pumuluyo. Ginpasira ang aton Open Dumping Site sa Brgy. Amiroy sang DENR kay indi  sang ayon nga paagi sa pag haboy sang basura sa ginasaad sang RA 9003 (Ecological Solid Management Act of 2000).  

          Ginamando sang sining  RA 9003 nga ang tanan nga banwa magpasad sang ila kaugalingon  nga “Sanitary Landfill”, ang paagi sa paghaboy sang basura nga may process kg policies nga sundun.   Ini naging dako nga problema sang sini nga administrasyon kay ang Mina isa ka 5th income class municipality nga limitado ang budget, kag wala sang nagakaigo nga pondo nga magpasad sang isa ka sanitary landfill facilities.  Nagpalapit ako sa DENR para ipresentar and problema sang banwa sang Mina, nagpasalamat ako nga mismo ang DENR nag offer sa aton banwa nga sila mapatindug kag mahatag pondo  sa Sanitary Landfill and Eco-Park Project. Isa ini ka dako nga oportunidad ang ginatanyag sang DENR sa imol nga banwa pareho sang Mina. Kalakip sang Sanitary landfill and pagpatindog sang Eco-Park nga ginapanan-aw ko nga mangin tourist destination sa ulihi kg ini makabulig sa aton ekonomiya.

          Plano pa lang ini tanan kag kun ma madayon  gid man, madamo pa ini nga proceso nga ma agyan tulad sang extensive planning kag  may feasibility study pa ini nga himuon para mahimo ang proyekto nga solid and sustainable. Dapat man nga ang mga negatibo nga epekto ma pondohan sang dako nga kantidad  katulad sang bio-enzymes nga ibutang para sa preparasyon kun may matabo gid man nga may magwa nga baho, leakage o may contamination sa tubig. Ini tanan parti sang dako nga plano nga kinahanglan mapreparahan.

        Pero nakibot ako nga kadamo na  nag comentar, nagapatalang sa katuyuan sini nga proyekto kag mga malisyoso nga tinaga ang ginapatuhoy nila sa sini nga proyekto kalakip na ang indi maayo nga mga halambalon sa mga opisyales sang banwa. Ginatuman ta lang ang ginasaad sang laye sa Solid Waste Management, do you think nga ipahamak ko ang banwa ta?

         Sa tanan nga naga pabutyag sang ila komentaryo kg pagpakalain sa sini nga proyakto,  ginapangayo ko ang inyo suggestions, basi may ara kamo alternatibo nga solusyon sang problema sa basura sa aton banwa?  Magkadto kamo sa akon opisina kay bululigan naton ini sa pagsolbar nga problema.

         Indi ninyo pag punggi ang pag uswag sang aton banwa nga  Mina, indi ninyo pagmulaya ang banwa ta. Tanan ginahimo sang sini nga administrasyon  pati ang pagpatindog sang aton simbahan para sa kaayuhan naton tanan.

       Sa naga komentar, pamangkuta ninyo inyo kaugalingon, ano ang nabulig ninyo sa kaaraydan sang aton banwa nga Mina?

       Ginadayaw kita sang halos tanan nga banwa sa probinsya sang Iloilo kay damo kita mga  Best Practices sa Good Governance, may madamo kita nga national awards kag recognitions,  we must be proud of these accomplishments.

       HIMUA NINYO ANG MAAYO PARA SA PAMILYA NYO KAY HIMUON KO MAN ANG MAAYO PARA SA BANWA TA.  INDI NINYO PAGHISAI ANG PAG USWAG SANG BANWA TA! WALA KO GINAABUSARAN ANG BANWA TA, INDI NINYO PAGPATALANGA ANG MGA PUMULUYO. AREGLADO NA ANG BANWA TA,  INDI KO PASUGTAN NGA MAG BAHO INI KAY MAHAMOT KAG MATINLO ANG PERSONALIDAD KO!

      WELCOME KAMO TANAN SA OPISINA KO PARA MAG HATAG SANG INYO PERSONAL NGA OPINIONS AND SUGGESTIONS PARA SA SINI NGA PROYEKTO!

     PANUNDUMA LANG NGA MAY CYBERCRIME PREVENTION ACT OF 2012 OR RA 10175!